(( محاورة شعرية ))
شاعر وشاعره جمعهم النصيب وتزوجوا ..
وكان بينهم اتفاق تكون ليلة العرس مختلفة وغير تقليدية ،
وان كل منهم يقول ابيات شعر ارتجاليه وقت وجودهم على الكوشه .. وبطريقة المحاوره ..
دخل العريس على عروسه واهي تنتظره على الكوشه ..
وبدا ينفذ الاتفاق .. واول شي رحب بالحاضرات وقال :
مرحبــا ضيفاتنا .. فالفـرح نوّر = ياهلا ويامسهلا بالحاضراتي
ارقصن غنن ولابي منكن اكثر = انفضن سمر الجدايل مايلاتي
الفرح بوجودكن .. يزها ويفخر = دامـه الله نعمــةٍ يالغـاليـــاتي
وبعد هالابيات .. رحب العريس بعروسه وقال :
الفرح فرحين وانتي الفرح الأكبر = يـاهلا بك ياعـروسي يـا منــاتي
قبلة الترحيب ، هاتي الخد الايسر = الشنـب يخـدش خـدود مـوّرداتي
ربي جمّعنــا .. وقـــول الله أكبــر = شاعـرٍ مع شاعرة باحلى غناتي
وجا دور العروس الشاعره .. وردت على عريسها وقالت :
ياهلا بك واحترم نفسك تـوّدر = وانثبر ساكت ولا تشوف ..البناتـي
فارغٍ قلبــك مثـل ذيــبٍ تحدّر = يلغف الخرفـان في صمت وسكاتي
لا تفكر يعرفن بالشِعْر الأحمر= ما يبن شعــرك .. بنـاتٍ عـــاقلاتي
ويلتفت العريس على عروسه وابياتها القويه ويرد :
شينهـا مـن ليـلةٍ يالـوجـه الاقشــر = اعقلي يابنت .. خوف من الشماتي
اضحكي قدامهن لو ضحكٍ اصفـر = ولا تفردّنــا .. تشــوفي الطايلاتي
وين عقلك بالشعـر .. راح وتنكـر = وين كلمة حـب .. ويـن المفـرداتي
فترد عليه العروس :
تحسبن العرس يالانثـى المذكر = مثل شعرك هرج .. صف القافياتي
العرس .. تدخل بعالم مثل تِقبـر = ما مضــى تنســاه تحيـا كالرفـاتي
المْــرَهْ بالعنـق .. والاولاد تكبر = والعـــوافي تعـقبــك فــي كــل آتي
العريس شاف السالفه بتخرب من اولها ، وعروسه بدت تشكي من اول ليله ..
فحب يسثيرها وقال وهو يوصف البنات الحاضرات وام العروس :
شوفي اللي لابسه فستــانٍ اخضــر = كنهـا لولـب برقـص المبدعاتي
وشوفي امـك كنهــا كيـسٍ مخصّــر = وفرقـي بيـن العجايـز والبناتي
وشوفي المزيون راع الشعر الاشقر= واهني الرجل فـي ريـم الفلاتي
وهنا العروس طقت عروقها .. وشالت الكلافه بينهم .. وردت عليه :
لعنبـو اصـلك تــرى لـو مـا تـدّبـر = وتستحـي يالشيــن تقعـد في ثباتي
لاصفقك كفين .. اعذر من قد انذر = واتركـك وحـدك وهـج بـلا عباتي
منت رجّـال .. ولـكن ثورٍ ازعــر = لا حيا .. لا سمت من كل الجهاتي
وتوقف العروس .. وتصيح بعريسها تطلب انه يقوم ويروحون :
هيّا قم .. قامت عصبك ولا تأخـر = ناويه أعطيك درسٍ في الصفاتي
ويرد العريس .. يمازح عروسته :
ماني قايم .. روحي لوحدك ولا اكثر = خايفٍ منك تجيبي لـي حماتـي
ويقومون الاثنين وينزلون من الكوشه .. والعروس تهمس في اذن عريسها :
شخّص ببشتك وراسك فوق اكثر = ودنق عيـونك .. ومشيك في ثباتي
وامسك بيدي .. وتبسـم ولا تنثّـر = ومن قرب حولك تردد .. "ياحياتي "
فيرد العريس بشويش :
من سمع هرجك .. يقول ولا تحذّر = ضبي شارد ما خذه ضبٍ نباتي
جعـل منتي ذيـك اُم الشعـر الاشقـر= لا .. وتتشرط علي وجه الدباتي
وتقفل مع العروس وتشين الاخلاق وتمسك نفسها لين وصلوا غرفة النوم ..
ثم قالت :
شف ترى مابي مشـاكل أو كـدر = خلنا نِـمْرحْ .. قبـل وقت الفـواتي
هدني الارهاق ولا احتاج السهر = والصبـح بدري يهجدوني خواتي
وابو الشباب يرد عليها .. :
مايصير .. اللي تقولي من عذر = ما انــام إلا .. بحل الواجباتي!
وش تقول امي .. إذا بان الخبر = وش اقول لهم ..تلحفت بعباتي!
والعروس تضيق بهالفسيحه .. وتقول :
لا تطـوّلهـــا ... وفـكــر بـالامـــر = وش دخلهم .. فــزواج الشاعراتي
وان رفضت ارميك في هذا الممر = واقفــل الغرفـه واطوّل في سبـاتي
وكما جرت عليه العاده .. يخضع العريس لرغبة عروسه .. ويتلحف ببشته ..!
P=
ليست هناك تعليقات:
إرسال تعليق